كريم دغيم يكتب : كمستثمر فى أسواق المال .. كيف تتعامل مع الفوكا " VUCA " ؟

المحلل الفنى كريم دغيم 

كتب / كريم دغيم *

عالم الفوكا (VUCA) .. هذا المصطلح تم إطلاقه فى الكليات العسكرية للجيش الأمريكى بعد الحرب الباردة، وكانو بيوصفو بيه الظروف المتقلبة وحالة عدم اليقين والتعقيد والغموض، وطبعًا البيئى دى هى التحدى الحقيقى لاى مدير أو قائد أو مستثمر وخاصة المستثمرين فى أسواق المال ...

لذلك دعونا نتحدث معاً عن بيئة " الفوكا " وكل حرف يرمز لايه وهنتعامل مع كل تحدى من دول أزاى :

" V " التقلب (VOLATILITY): طبعًا أنت عارف أن التقلب أو التذبذب فى الأسعار من أهم ما يميز أسواق الما ل ، فواحدة من طرق اختيار الصفقات لما السهم أو الأصل يكون بيتحرك فى نطاق سعرى ضيق وبعد كده النطاق ده يبدأ يكبر ده تكنيك ظريف،  لكن مهم جدًا تعرف إن التقلب الكبير معناه مخاطرة كبيرة وعدم التقلب معناه ضعف الفرصة ..وفى الوقت الحالى حاول تختار أصل أو سهم التقلب فيه متوسط الدرجة .. وخفف استثمارك فى الأصل أو السوق لما التقلب فيه يبقى عالى ومعاك أرباح كويسة .

 

" U " عدم اليقين (UNCERTAINTY): بيحصل أوقات وأنت بتختار الفرصة الاستثمارية إن  الثقة فى الأصل الاستثمارى أو السوق أو السهم بتبقى ضعيفة أوقات السوق بيكون هش وأقل " بياع " بيخلى الأسعار تنزل جامد والسوق  الفرص فيه قليلة حاول فى الوقت ده تكون بتخرج من السوق أكتر ما بتدخل وتزود السيولة فى أصول واضحة الأداء .

 

" C " التعقيد (COMPLEXITY) : عادتًا المشكلة دى بتواجه المستثمرين أللى بيشتغلو بأدوات صناعة قرار بعيد عن التحليل الفنى، طبعًا بيبقى عندهم مدخلات كتير جدًا وفيه أوقات بتبقى عكس بعض، وهنا يُفضل أن يبقى فيه جزء من المدخلات دى معتمد على التحليل الفنى للترجيح لأن التحليل الفنى بيقدر يتعامل مع الرسم البيانى فقط ويخرج منه بقرار استثمارى .

 

" A " الغموض (AMBIGUITY): أوقات كتير السوق بيبقى بدون اتجاه وبيبقى صعب التعامل فيه جدًا على المستثمرين وحتى المحترفين منهم وهنا يُفضل طالمًا مش واضحة عندك الرؤية إنك تخفض حجم الاستثمار وتتجه لاستثمارات أكثر وضوحًا .

 

كده أنا كلمتك عن " الفوكا " وبتتكون من أيه .. وكمان قلتلك بشكل مختصر ممكن تتصرف أزاى فى البيئة دى .. بس مهم جدًا إنك يبقى عندك خطة وتلتزم بيها وتطورها لأن الأسواق كل مدى تعقيدها بيزيد وكل فترة حركتها بتختلف  .. بالتوفيق ان شاء الله.

* كريم دغيم .. محلل فنى خبرة 15عام فى المتاجرة والاستثمار فى أسواق المال .. وحاصل على شهادتى (CETA-CFTe)